Førjulsaktivitetar for små og store
Med ein dryg månad igjen til jul, er førjulsaktivitetane i full gang. I helga kan du få julestemning fleire stader i nærmiljøet.
Laurdag arrangerer Sørflatanger grendelag tradisjonen tru til julemesse i Framheim på Vik.
Salsutstilling, mat og årer
– Vi har gode utstillarar i år og, fortel Thea Constanse Eian Lindseth i arrangementskomiteen.
Ho nemner at ein mellom anna kan få kjøpt brukskunst i både tre, skinn og garn. Villa fyr venneforening er også på plass, det same er Flatanger historielag.
Grendelaget kan by på kaffi, kaker, gløgg og juletallerken, og det blir også åresal.
– Vi har veldig fine gevinstar på åresalet, kan Thea fortelje.
Arrangementet startar kl. 12, og klokka 14.30 vil det bli annonsert kven som er årets Fysak-vinnarar.
Juleverkstad på Seter
På kapellet på Seter blir det juleverkstad for små og store søndag klokka 12. Det er Seter bedehusforening som arrangerer.
– Vi starta med dette i fjor, det kom mange og det var så triveleg, seier Lovise Angen som er leiar i foreininga.
Ho fortel at ein kan lage julegåver, men at det óg går an å komme for ein kaffikopp og ein prat.
– Det blir ikkje berre juleverkstad. Vi serverer mat, og det blir julemusikk.
Førjulstreff på bygdemuseet
Også på Flatanger bygdemuseum er det klart for førjulsaktivitetar søndag. Museets venner Flatanger inviterer både barn og vaksne til å støype lys og lage julelenkjer frå klokka 12 og utover.
– Vi byr på kaffi, saft og pepperkaker, fortel Anja Vedvik som er kasserar i venneforeininga.
Sidan det kan vere litt kaldt i museet vinterstid, har ho ei klar oppfordring:
– Ha på varme klede før de kjem, seier ho.
Julemarknad på Statland neste helg
På Statland kan du dra på julemarknad i musikkhallen også i år, men det er først neste helg. Søndag 30. november frå kl. 11 blir det mogeleg å kjøpe julegåver og lodd, det blir sal av graut – og ikkje minst blir det juletrekasting.
